Sodeli endlich hani Zit fuer d'Fortsetzig :P Nähmet nech Zit!
Am Sunntig am Morge simer de am 6i uf, da wir am Vortag ufem andere Campingplatz verpennet hi....di erschti Nacht mir Rään isch definitiv wärmer gsi aus di zweiti. Zudäm büni sehr froh gsi um mis Mäteli. De Ollie, d'Laurie u Isabelle hi Tina u mir regurächt fasch usem Zeit gstosse ide Nacht. Bü mind. 1m witer links gsi aus am Abe devor....wenigschtens isch ds Mäteli mitcho...Tina isch am Bode gsi....
Nachdäm wir schnäu chli Brot mit Honig aidrückt u üses Zügs umi i Kofferrum gmoschtet hi...himer üs de ufe Wäg gmacht für ga de Mount Edith ....irgendöpis ga adsgugge. Leider himer aber kinner Karibu gseh...de Gletscher mit sim chline Seeli isch aber mega schön gsi. Witer simer de nomau irgend a Wasserfau ga agugge....o dä isch wunderschön gsi...doch himer üs natürlich mega uf d'Wanderig ufem Gletscher gfröit. Am 11i nachdäm wir üsi hissi (scho fasch obligatorischi) Schoggi ghäbe, as Sandwich für später kuft u üs mit Kappe, Spikes, Händsche, Jacke,... usgrüstet hi, simer de los glofe....3h ufem Gletscher...isch super gsi!!! De Guide het üs vüu verzöut u zigt. As isch scho nid so ohne...gwüssi Lüt (hie irgendwelchi Asiate) überlege scho nit nüt, sondern gar nüt!!! I Turnschue, ohni irgendöpis, i kurze Hose & T-Shirt sisi säuber übere Gletscher glofe, klätteret,....hoffe itz mau as ischne nüt passiert...schüsch fünt de öper mau gfrores Sushi!!!
Ufem Wäg zrug himer de nomau a Schwarzbär gseh u bim Lake Louise u bim Morrain Lake haut gmacht für d'Tina. Zwö wunderschöni See. Zum Abschluss hets no as Foto vom Castle Mountain ghä...obwouh d'Laurie scho lang nüme het möge... Gseh himer a däm Tag numeno schnäu ds Füdle vomna Bär u as paar Reh vo witem...
Mi hi de üs doch gäge ds Schwänze entschiede u si am Mentig am Morge schön brav id Schu : P Am Nami simer de mitem Auto nach Banff. Tina & i si ga de Sulphur Mountain erklimme, während di andere drü igentlich hi wölle ga Musee agugge u no ide Radium Hot Springs ga bade...schlussendlich isch aber d'Isa allinig underwägs gsi u de Ollie (verknaut id Laurie) mit ihra chli ga biere....
Ds Wätter isch nid aso schön gsi u as het gränet...drum hani Kamera im Outo gla u mi si glich ga Wandere (git ja nume 2-3h für wui u ai)....denkste....zersch simer is ga zieh...und siehe da...as het ufghört räne womer losglofe si :D Ohni Kamera, d'Tina het ihri im Auto vergässe, simer de wui glofe.....hi a wunderschöni Ussicht uf Banff ghäbe...u si nach 4h umi dune gsi...di 2-3h si für 1 Wäg gsi : P Chum simer dune gsi...himer afa Stöple um nach Banff ds cho....ersch öpa ds 5te Outo het gstoppet u womer grad losgfahre si hets afa ailöse wi nüt *Glückgehabt* As Päärli us Frankrich het üs mitgno...u mi his de doch no rächtzitig gschafft zum Starbucks...trotz 10min verspätig simer di erschte gsi!!!
Mit schos 2 liecht atrunkne (6-7 Bier) simer de ids Grizzlie House ga ässe....det hetmu würklech aus chönne ha...vo de Kobraschlanga, zum Aligator, übere Struss zum Hai, witer zum Wiudschwii, Elch, Karibu,....ifach aus...
Wir hi üs de für ds Originau Fondue entschiede mit Beef & Chicken :D As isch tüür gsi, aber mega fein!!!
Zersch hets a grüena Salat gä, nai us Vorspiis as chlises Käsfondue u as Gmüesfondue, us Houptgang himer nai üses Fleisch ghäbe (aber a la Tüschgrill u nid Fondue) u zum Dessert no as Schoggifondue!!! Mmmmmmmhhhmmm...bechume grad Hunger :P Natürlich isch mi Karaokeabe vor de Tür gstane....u i ha scho mau mit 2 Molson Canadian (Bier) agfange währendem z'Nacht!!! Dür das dasi wenig gschlafe ha, etc...hetis wahrschinlech scho glängt zum Singe :P Zäme mit de Laurie u em Olli isch dä Abe hammermässig verlofe....isch mega amüsant gsi!
Da wir no chli früh dra si gsi für ids Drake simer zersch no ids Grizzly Paw ga na Drink u a Tequila näh.....ds Singe (Hey Jude) isch de schlussendlich wi vo säuber gange ;) Itz warteni no uf mini Massage :P Mi si sogar no inisch alli zäme so chli ga singe ;) Nächscht Wucha isch de nomau Karaoke agsit!
Wie immer isches ide Schu mega luschtig, o wes vo de Organisation här mit de Aktivitäte aube nid so klappet...
Am Abe simer de ga Klättere (Bouldere). Het mega gfägt, nume isch nid die ganzi Halla usglit mit Matte u du muesch ging vorhär Matte verschiebe, gugge dasder si über naschiebt oder dasdu schräg aigumpisch wedu nüme masch...ma isch nämlich schono mega schnäu müed.
Am Mittwuche het d'Tina Geburtstag ghäbe u a wir si zäme ids Luna Blue ga Pasta ässe....ds Desert isch super gsi...o we di erschte 4 ufem Rücke vo de Isa glandet si...de Käuner isch chli scheisse gsi....fucked up..het nüt im Griff ghäbe...aber ja...ds ässe isch guet gsi u das isch ds wichtiga ;)
Dena simer umi amau ids Grizzly Paw...öpis nüüs....u de François (o vo Quebec) u de Roman wette üs gär überzüge für Sky Diving...aber ja....chli tüür...bruche ds Gäud für öpis anders ^^ Ha scho vüu meh brucht ausi igentlich a wölle....
Am Donnschtig büni de endlich mau dezue cho ga ds gugge wis usgseht mit Hockeysache hie in Canmore...itz wärde de Prise vergliche...Am Abe büni zude Tina ga a Füum gugge...wiss de Name nüme u o nid würklech um was dases im Füum gange isch...mi si beidi ipennet : P
Hüt (Fritig) büni mitem Francesco, de Tanja, de Isa u de Tina mitem Auto zum Yoho National Park. Gseh himer umi mau Wasserfäu (ina devo ghört zude grösste ds Kanada) u irgendwie schüsch Schluchte u Ussichtspünkt. Ds Wätter isch dete wenigschtens nid so wüescht gsi wi ds Canmore....mi hetti igentlich wölle d'Lady Macdonald erklimme...aber das isch nüt worde! A Elk, as paar Chipmunks u a Bär (wo nume d'Isa gseh het) si di einzige tierische Begägnige gsi....de Grizzly chümer bim Minnewanka u Quarry Lake ga gugge....si grad uma :D Hi igentlich ume Minnewanka wölle ga Wandere aber ds Gebiet isch glubs gsperrt :( Het ds vüu Grizzlies mit Junge uma. Mau gugge obmer am Sunntig zum Quarry Lake chü ga?!?
So mor isch am 7.30 Abfahrt zu de Middle Sister! Das hisst amau uf u hüt früh ga liege : P Ev. no schnäu ids Grizzly (aber nume churz!!!)
Wünsche öich as schöns Wuchenänd!
0 Kommentare:
Kommentar veröffentlichen